«Ураһалаахха» муус оҥоһуктарга күөн күрэс ыытылынна

Мэҥэ-Хаҥалас улууһугар туризм сайдыбыта 20 сылыгар аналлаах муус оҥоһуктарга аһаҕас куонкурус «Ураһалаах» алааһыгар ыытылынна. Оччолорго Догдоҥо нэһилиэгин Сото сиригэр итиэннэ Манчаары Баһылай төрөөбүт алааһыгар биир дойдулаахпыт, Норуоттар Доҕордоһууларын уордьанын кавалера, «Гражданскай килбиэн» бэлиэ хаһаайына, улуус Бочуоттаах гражданина Василий Атласов туризм эйгэтэ сайдарыгар бастакы олук уурбутун бэлиэтээтилэр. Муус оҥоһуктар куонкурустарыгар ыраахтан-чугастан кэлбит кыттааччылары Василий Николаевич кэргэнинээн, СӨ култуура үтүөлээх үлэһитэ Валентина Иннокентьевналыын көрүстүлэр. Саха култууратын, үтүө үгэһин киэҥник тарҕата, ыччаттары көҕүлүүр биир дойдулаахтарбытыгар улуус баһылыга Николай Старостин улуус социальнай-экэнэмиичэскэй сайдыытыгар сүҥкэн кылааттарын килэрсибиттэрин бэлиэтээн туран Грамота туттарда, махталын тиэртэ. Мустубут ыалдьыттар салгыы муус оҥоһуктары көрдүлэр-иһиттилэр. Тыйыс тымныылаах, хаар-муус дойдулаах Сахабыт сиригэр көрүөхтэн кэрэ көстүүлээх муустан оҥоһук эйгэтэ кэҥээн-чэчирээн иһэрэ чахчы да кэскиллээҕин бэлиэтээтилэр. Маныаха сылтан сыл аайы мууһунан дьарыктанааччылар элбээн, эдэрдэр ылсан иһэллэрэ кэрэхсэнэр. Намтан кэлбит ыалдьыттарбыт биһиги улууспутугар муус оҥоһуктар куонкурустара далааһыннаахтык ыытыллалларын хайҕаатылар. Бу күн алааска бииртэн биир үчүгэй, кэрэ, ураты быһыылаах-таһаалаах 15 муус оҥоһук дьэндэйдэ. Нэһилиэктэртэн уонна атын улуустартан 30-тан тахса киһи кытынна. Куонкурус түмүгүнэн бастакы миэстэни Мөҥүрүөн нэһилиэгэ, иккиһи ыалдьыттарбыт намнар, үсүһү ыаллыы сытар Уус Алдан уустара сүктүлэр. Миэстэлэспиттэр харчынан бириэмийэлэннилэр, үксүлэрэ илии тутуурдаах, өттүк харалаах бардылар. Муус оҥоһуктары көрө-истэ кэлбит ыалдьыттар оҕо куйуурдуу турарын, көтөн иһэр табаны, таптаспыт кубалары, эһиилги сыл бэлиэтин Бөтүүгү, Баай Байанайы, Дьөһөгөй оҕотун уо.д.а. оһуордаах-мандардаах кыраһыабай оҥоһуктары астына, хайгыы, сөҕө көрдүлэр. Маннык кэрэ бэйэдээҕи сэргээбиттэр, сэҥээрбиттэр кэлэн көрүөхтэрин, хаартыскаҕа түһэрэн үйэтитиэхтэрин сөп.

«Ураһалаахха» муус оҥоһуктарга күөн күрэс ыытылынна
© ЯСИА.RU